Sabías que

Sabías que os mariñeiros da ría de Ares din que “Cando A Laxe da Boca da Ría vexas espumar, non saias a faenar” ou “Cando A Laxe da Boca da Ría vexas romper, traballos na casa toca facer”?

Sabías que, como di a cantiga, A aldea da Agrela é moi divertida, ten a estrada na entrada, e A Estación na saída.

Sabías que "cando a barra de Ladrido roxe, inverno forte"?

Sabías que en Arteixo din que  "Se brúa Valcovo, tempo revolto"?

Se estás en Vigo, ten coidado coa "Neboa en Aldán" porque anuncia "chuvia na man"

Din en Sarria "Se vén o vento de Piñeira, arma a caldeira á goteira" cando o vento vén do sur.

Sabías que "cando o monte Xiabre pon a capa e o monte Xesteiras pon o capelo, deberás volver a casa polo mantelo"?

Sabías que "mentres auga teña o río Miño, no Ribeiro non faltará viño"?

Sabías que en San Cristovo de Cea dise "se vas a Oseira, leva o pan na faldriqueira; se vas para Camba, lévao na manga; e se vas para o Deza, que non che esqueza"?

Sabías que polo Carballiño dise "os de Vilaenfesta parten a testa; os de Trabazos parten os brazos; os de Tanxil teñen barriga de tamboril; os do Gamoal comen o caldo sen sal; e os de Arenteiriño derraman o fuciño"?