Topónimos xacobeos en Forcarei

O Camiño Francés, O Camiño Inglés, A Vía da Prata, O Camiño de Inverno, O Camiño Portugués... todas son rutas de peregrinación a Santiago de Compostela internacionalmente recoñecibles e moi transitadas. No entanto, existiron outra moitas vías históricas que non resistiron o paso do tempo e foron caendo no esquecemento case sen deixaren pegada. Algunha delas foron recuperadas recentemente grazas, entre outras, á toponimia. En Forcarei temos un bo exemplo.

O Camiño da Geira e dos Arrieiros é unha ruta medieval que se empregaba para transportar o viño do Ribeiro a Compostela, mais, na orixe foi tamén unha das moitas rutas de peregrinación xacobea. O nome da freguesía de Meavía está aí para lembrar o seu paso por terras de Forcarei. Procede do latín MEDIAM VIAM e fai alusión a un lugar situado no medio dun camiño entre dous puntos equidistantes.

Mais este non é o único topónimo con reminiscencias xacobeas que atopamos neste municipio pontevedrés. Na propia freguesía de Meavía existe un outro topónimo viario, A Rúa, que fai referencia a un camiño con vivendas aos lados. Outros topónimos A Rúa situados ao pé do Camiño de Santiago están localizadas en Ordes, Mos, Padrón ou Betanzos. 

Na freguesía de Pardesoa existen outros dous nomes estreitamente vinculados coas peregrinacións xacobeas. O primeiro é o máis evidente de todos: a advocación da parroquia é o propio Santiago. Mais tamén está o lugar de Pousada, un topónimo viario propio dos camiños e as vías de comunicación. Procedente do latín PAUSATA , participio do verbo PAUSARE ‘pousar’, e este derivado de PAUSA, na orixe puido facer referencia tanto á existencia dunha pousada ou venda para descansaren e repoñeren forzas os viaxeiros e camiñantes a Compostela como, máis probablemente, a un núcleo habitado situado nun tramo de camiño onde poder descansar.