Dende o ano 2017, a Secretaría Xeral de Política Lingüística en colaboración coa Real Academia Galega están ofrecendo charlas divulgativas por medio do programa Toponimízate en concellos, colexios, asociacións culturais e centros de maiores sobre o valor cultural da toponimia galega e a necesidade de colaborar na súa recolleita a través da plataforma Galicia Nomeada.
Esta campaña informativa ten como obxectivo principal concienciar a cidadanía do risco que ten de perderse esta parte tan importante do noso patrimonio inmaterial co fin de involucrar a xente que asiste ás charlas na súa salvagarda. Nos relatorios explícase pormenorizadamente o uso da aplicación colaborativa Galicia Nomeada, así como a rendibilidade que se lle pode tirar a esta capa de información cultural unha vez que está xeorreferenciada e normativizada. Ademais, tamén se expón de forma divulgativa o significado dos topónimos maiores (parroquias e aldeas) do concello onde se imparte a charla.
As referidas sesións divulgativas tiveron moi boa acollida nos máis de 80 concellos galegos onde se realizou ata agora esta actividade e prevese continuar con esta liña de actuacións para fomentar a participación cidadá no proxecto Galicia Nomeada.
