O Seminario de Onomástica responde: Laza

Boa parte dos investigadores coinciden en afirmar que o topónimo Laza e derivados -como Laceira, Laceiras, As Laceiras... proceden de (G)LACIA, étimo relacionado co termo latino GLACIES ‘xeo’, do que deriva a voz do galego común glaciación. Agora ben, malia que este significado encaixa á perfección coa locación dalgúns destes lugares, non é así para o lugar, parroquia e concello ourensán mundialmente coñecido polo seu Entroido ancestral. A súa situación a carón do río Támega nunha zona chaira e bastante abrigosa levou a que varios investigadores propuxesen outra hipótese para explicar a súa orixe.

Vicente Feijoo Ares, coordinador técnico do Seminario de Onomástica da Real Academia Galega, explica a posible orixe prerromana do topónimo Laza, ademais de deterse noutros nomes deste concello ourensán como Naveaus, A Alberguería ou a praza da Picota, que nos falan da importancia que tiveron historicamente as diferentes vías de comunicación que atravesan estas terras ourensás.