O IES do Milladoiro é un centro de premio: o seu proxecto “Ao son da oralidade. O noso patrimonio”, desenvolvido xunto ao IES Marco do Camballón de Vila de Cruces, recibiu un galardón da Fundación Antonio Fraguas Fraguas ao proxecto didáctico á investigación escolar arredor do patrimonio lingüístico e cultural galego. Tendo en conta que a toponimia foi un dos elos fundamentais deste proxecto, Fran Cañotas tiña que “volver ás aulas” neste novo capítulo da serie Os nomes da nosa terra para coñecer de primeira man en que consistiu.
Claudia e Ángela, dúas das alumnas do IES O Milladoiro que integran o Equipo de Dinamización da Lingua Galega, cóntannos unha das principais iniciativas que levaron a cabo: elas e outros compañeiros do equipo mantiveron un programa na radio no instituto en que divulgaron a riqueza toponímica do concello de Ames. Outro dos moitos recursos que crearon foi un xogo de toponimia para coñecer a etimoloxía dos 313 concellos que forman o país, segundo nos explican Paula e Andrea.
Manolo Maseda e Valentina Formoso, dous dos docentes que dirixiron este proxecto, explícannos cal foi a súa principal motivación: moito do alumnado do IES do Milladoiro descoñecía o territorio que habitaba, dado que as súas familias procedían doutras partes do país e mesmo do estranxeiro.
Tras coñecer con Mateo, Iago, Claudia, Gael e Ángela algúns dos nomes dos lugares que rodean o centro de ensino, Fran Cañotas pregúntalle a Vicente Feijoo Ares, asesor científico desde microdocumentais, pola orixe e significado do topónimo O Milladoiro.
