A primeira iniciativa institucional para a recolleita da microtoponimia galega: o Proxecto Toponimia de Galicia (PTG)

Xermán García Cancela, director do Proxecto Toponimia de Galicia (2000-2011) e secretario da Comisión de Toponimia de Xunta de Galicia, fálanos neste vídeo dos obxectivos cos que naceu no ano 2000 este pioneiro proxecto de salvagarda da microtoponimia galega.

A iniciativa foi promovida pola Comisión de Toponimia, que depende da Consellería de Vicepresidencia, a mesma que posúe as competencias en materia de toponimia na nosa comunidade autónoma. Mais o proxecto foi executado durante 10 anos desde o Sistema de Información Xeográfica de Galicia (SITGA), órgano cartográfico da Xunta de Galicia que dependía, primeiramente, da Consellería de Política Agroalimentaria e Desenvolvemento Rural e, posteriormente, da Consellería do Medio Rural.

Xermán García explica as fases de desenvolvemento deste proxecto e os bos resultados acadados nos seus 7 primeiros anos de vida. Foi unha verdadeira mágoa que no ano 2011 se vise interrompido cando chegou a ser o referente a nivel estatal nos traballos relacionados con esta disciplina multidisciplinar.

Grazas, Xermán, polo teu labor e pola túa loita coas institucións que financiaron durante eses anos esta iniciativa na que tanta ilusión e esforzo puxeches.