A toponimia é moito máis que patrimonio cultural. Grazas a ela podemos descubrir as chaves para interpretar o noso territorio, para descubrir cousas do pasado que non están escritas en ningures, pois os nomes de lugar poden preservar a memoria dun pobo e transmitir a súa historia. Algo disto poderemos ver neste novo capítulo da serie “Os nomes da nosa terra” no que Fran Cañotas visita o concello de Rodeiro.
Alí conversará con Xoán Carlos García Porral, antropólogo, escritor, investigador, profesor de ensino secundario e, sobre todo, un auténtico namorado das terras do Deza. En Rodeiro, visitarán O Castelo de Baroncelle, A Pena Bicuda, A Pena dos Cruceiros... e descubriremos a orixe da construción chamada A Tulla do Outeiro de Fafián, un topónimo metafórico que nos leva a épocas en que os monxes de Oseira recollían as rendas e as gardaban aquí, como ben nos explica Xoán Carlos.
Tras coñecer con Xoán Carlos as historias e lendas agochadas nalgunhas pedras de Rodeiro, Fran Cañotas disponse a facer parte do Camiño de Inverno con Luis López Diéguez, actual presidente da Deputación de Pontevedra, pero que foi alcalde deste concello entre os anos 2011 e 2021. Luís explicaranos a orixe da Ponte do Pedroso e falaranos do xentilicio popular polo que son coñecidos os habitantes de Rodeiro, cambotes. O termo deriva do nome tradicional deste territorio, A Terra de Camba, e que Vicente Feijoo Ares, coordinador técnico de Galicia Nomeada e do Seminario de Onomástica da RAG, explicará no remate deste episodio.
Detrás dalgúns topónimos hai historias que nos falan das crenzas relixiosas ou pagás dos nosos antepasados, historias que chegaron ata…
A vida nunha illa transcorre paralela aos feitos que afectan ao resto do mundo, pero coas súas propias singularidades. Isto fai que os…