Xoán Carlos García Porral: un lalinense apaixonado da microtoponimia, a memoria e a tradición

Xoán Carlos García Porral é un dos cabaleiros gardiáns da memoria colectiva dos dezaos. É natural da parroquia de Goiás, na que está recollendo a súa microtoponimia xunto coa doutras parroquias lindantes do concello de Lalín, pero tamén achega topónimos dos concellos de Rodeiro e Dozón, onde ten familiares e amizades.

En total, xa leva introducido en Galicia Nomeada uns 631 microtopónimos, con lendas, audios e vídeos. Estamos falando da súa achega como usuario particular de Galicia Nomeada, porque non esquezamos que Xoán Carlos é o profesor do Instituto Pintor Colmeiro de Silleda que coordinada o grupo de alumnos e alumnas que recompilaron 1.600 microtopónimos, coas súas correspondentes lendas, neste concello e que gañaron o IX Premio Didáctico Antón Fraguas por este magnífico traballo.

Pero a teima de Xoán Carlos por valorar, salvagardar e difundir a sabedoría popular dos nosos maiores, xa vén de moito antes. Como doutor en antropoloxía social, o camiño investigador de Xoán Carlos está iluminado pola posta en valor do patrimonio histórico e cultural da Comarca do Deza, pois para el resulta imprescindible manter a identidade individual e comunitaria do rural. É un gran coñecedor dos cambios e transformacións que se produciron nas últimas décadas nestas aldeas, pois a súa tese doutoral versa sobre a modernización do rural mantendo a tradición cultural. Tamén ten un traballo publicado sobre a vida na súa parroquia natal de Goiás, análise socio-cultural extrapolable a unha porcentaxe moi alta das parroquias do territorio galego. Este coñecemento do mundo rural e das súas xentes é o que lle permitiu facer un libro de relatos artellado arredor da vida dun caseiro dende cativo ata a súa vellez. Tamén ten libros publicados sobre as lendas dos nosos seres míticos que máis topónimos teñen motivado, os mouros e as mouras.

Neste vídeo aparece Xoán Carlos introducindo en Galicia Nomeada o micrtopónimo A Fonte da Solleira, achegado polo informante Modesto López Currás, que tamén sae contando a historia desta fonte.

Grazas, Xoán Carlos, polo teu entusiasmo e pola túa importante contribución a Galicia Nomeada, non só polos topónimos mais o patrimonio inmaterial asociado a eles, senón polo labor de promoción e difusión do noso proxecto.