Máis de 100 solicitudes de contas de usuario para Galicia Nomeada nun único día

Tras publicarmos as estatísticas das achegas nos últimos dous meses, a aplicación colaborativa Galicia Nomeada recibiu a solicitude de máis de 100 novas contas de usuario nun único día para contribuír a salvagardar o patrimonio toponímico de Galicia. A ferramenta que está tendo tanto éxito entre o voluntariado cultural de Galicia foi creada con cargo ao proxecto europeo Geoarpad, integrado no Programa de Cooperación Interreg VA  España – Portugal (POCTEP 2014-2020).

Se ti tamén queres pór o teu grao de area nesta obra colectiva, precisas cubrir un formulario de solicitude no que agradecemos a maior cantidade de datos posibles (nome, apelidos, correo electrónicos, provincia, teléfono de contacto, profesión, estudos, motivo polo que decides realizar achegas e concellos sobre os que tes un maior coñecemento). O sistema non é automático pois require a validación do equipo de especialistas do Seminario de Onomástica da Real Academia Galega

Galicia Nomeada conta cunha versión de escritorio e tamén cunha aplicación para dispositivos Android e Apple. Se tiveres algunha dúbida sobre o funcionamento da app ou sobre o portal Galicia Nomeada, contacta connosco.

Agardámoste!