A microtoponimia protagoniza “Os Contos de Castelo”
Os “Contos de Castelo” é un espazo de encontro onde a veciñanza das aldeas desta parroquia cullerdense se reúnen para celebrar, dentro do marco do Festival Castelo Conta, a oralidade como ferramenta para gardar e transmitir a nosa memoria; e tamén, como non, os nomes da terra.
O martes 26 de agosto, a aldea de Vilaverde acolleu unha destas conversas onde o importante era falar, escoitar e compartir lembranzas e memoria. O espazo foi conducido polo guionista Óscar Cruz e contou coa presenza do polifacético Xosé A. Touriñán, creador do festival, e mais o actor Tone Martínez, que se dedicaron a captar as historias, anécdotas e lembranzas que quixeron contar as persoas asistentes.
No transcurso do encontro, conducido ao xeito dun programa televisivo, subiu ao escenario Iván Méndez López, técnico do Seminario de Onomástica da Real Academia Galega. Fíxoo convidado pola organización para presentar o proxecto de recolla toponímica que se levou a cabo no marco do festival e do que demos conta hai uns días nesta páxina. Na súa intervención houbo palabras de agradecemento tanto para o festival por organizar as proveitosas andainas toponímicas como para a veciñanza das aldeas de Vilaverde, Folgueira, Xián, Castelo de Abaixo, Xalo e Donepedre, que se implicaron desde o primeiro momento no proxecto. De feito, moitas das persoas que participaron nas recollas toponímicas estiveron presentes no acto e interviron para contaren historias e lembranzas arredor da toponimia que foron saíndo na conversa: Maspete, A Corredoira da Cega, O Marco das Salgueiras, A Vella Morta...
Iván Méndez quixo salientar tamén que os máis de 350 topónimos que se recolleron durante a semana do 11 de agosto están xa dispoñibles na plataforma Galicia Nomeada. Ademais, convidou a todas as persoas asistentes a unirse ao proxecto para completar, entre todos, o mapa colectivo da súa freguesía e continuaren así a transmisión xeracional dos seus nomes de lugar. Algunhas persoas doutras parroquias de Culleredo que asistiron ao evento e mesmo de concellos limítrofes como Cerceda ou Carral amosaron o seu interese en reproducir o traballo nos seus lugares de procedencia.
Tras a presentación, Óscar Cruz e mais Iván Méndez comprobaron o coñecemento do público da súa freguesía cun xogo feito para a ocasión no que, a través de imaxes e fotografías, procuraban pórlle nome aos espazos de Castelo.
Unha vez máis, queremos agradecer o interese amosado polos organizadores de Castelo Conta, en especial a Xosé A. Touriñán como creador do festival, por programar esta actividade e ser un modelo de referencia para todas as festas parroquiais do país; e tamén a implicación de toda a veciñanza de Castelo tanto nas andainas coma no acto de onte.
